«Жігіт сұлтаны – 2025» байқауы жеңімпаздарын анықтады

2025 жылғы 20 мамыр күні Жаңа Майқұдық мәдениет үйінде колледж студенттері арасында дәстүрлі облыстық «Жігіт сұлтаны – 2025» байқауы өтті. Бұл байқау – ұлттық құндылықтарды насихаттап, жастардың бойына рухани тәрбие дарытуға бағытталған маңызды мәдени шаралардың бірі болып табылады.

Мақсаты – ұлттық болмысты ұлықтау
Байқаудың негізгі мақсаты – ата-баба салтын дәріптеу арқылы жастарды батырлыққа, тапқырлыққа, шешендікке, имандылыққа баулу. Сонымен қатар, жастардың бойына отансүйгіштік, достық, мейірімділік пен сүйіспеншілік секілді асыл қасиеттерді сіңіру көзделді.

Байқау кезеңдері
Сайыс үш негізгі кезең бойынша өтті:

«Өзге емес, өзім айтам өз жайымда» – бұл кезеңде қатысушылар өздерін таныстырып, өмірлік ұстанымдары мен армандарымен бөлісті.

«Өнерге әркімнің ақ бар таласы» – қатысушылар ән айтып, күй шертіп, өлең оқып, түрлі шығармашылық қабілеттерін паш етті.

«Бар ізгілік тек білімнен алынар» – бұл кезеңде қатысушылар қазақ халқының тарихы, әдебиеті, салт-дәстүрі мен ұлттық спорт ойындары бойынша қойылған сұрақтарға жауап берді.

Байқауға облыс бойынша іріктеліп алынған 12 үміткер қатысып, өздерінің жан-жақты білімдері мен өнерлерін ортаға салды. Жігіттер арасындағы бұл дода тартысты әрі қызықты өтті.

Жеңімпаздар анықталды
Қазылар алқасының әділ шешімімен байқау қорытындысы төмендегідей нәтижемен аяқталды:

🏆 Бас жүлде – Төлеутай Жансерік, Қазақмыс корпорациясының политехникалық колледжінің студенті;

🥇 І орын – Аманжол Елдар, Қарағанды жоғары мейіргерлік колледжінің студенті;

🥈 ІІ орын – Нұрлыбеков Мағжан, Қарағанды тау-кен индустриалды колледжінің студенті;

🥉 ІІІ орын – Қыдырбай Бекболат, Қарағанды жоғары политехникалық колледжінің студенті.

Барлық жеңімпаздарға арнайы дипломдар мен ақшалай сыйлықтар табысталды.

Ұлттық рух пен мақтаныш
«Жігіт сұлтаны» байқауы – тек жарыс қана емес, ол – қазақ ер азаматына тән тәрбиені, рухани құндылықтарды дәріптейтін алаң. Мұндай шаралар арқылы жастарымыз өз тарихын, салт-дәстүрін құрметтеп, рухани байып, ел болашағына жауапты ұрпақ ретінде қалыптасады.

Байқау соңында ұйымдастырушылар қатысушылар мен жеңімпаздарға алғыс білдіріп, келер жылдағы байқауларға сәттілік тіледі.